No-IMG

د خپلمنځي خواخوږي نبوي لاره

     رسول الله صلی الله عليه وسلم فرمایي: د بنو اشعر قوم خلک چې کله په غزا کې غریبان شي، یا یې ښار کې د کورنیو خواړه کم شي، خپل ټول خوراکي توکي په یوه څادر کې یو ځای کړي، بیا یې پخپلو کې په یوه لوښي سره برابر ووېشي، دا خلک زما څخه دي او زه له دوی نه یم، یعني د دوی دا کار په مکمله توګه په شریعت برابر او زما طریقه ده.

     عن أبي موسى رضي الله عنه قال: قال النبي صلى الله عليه وسلم: إن الأشعريين إذا أَرْمَلُوا في الغزو، أو قلَّ طعام عِيَالهم بالمدينة جمعوا ما كان عندهم في ثوب واحد ثم اقتسموه بينهم في إناء واحد بالسويّة، فهم مني وأنا منهم. صحيح البخاري 1/ 307 رقم 2486. صحيح مسلم 4/ 1944 رقم 2500

د حدیث شرحه او ګټې

1-اشعریین د بنو الاشعر قبیلې خلک دي، چې د قحطان له سترې قبیلې سره تړاو لری،  دوی اصلاً د یمن د اب ولایت اوسیدونکي دي، اوس د اسلامي نړۍ مختلفو سیمو کې، یمن کې او د سعودي نجران او احساء کې اوسي، مشهور صحابي ابو موسی الاشعري رضي الله عنه له دې قوم نه و،  رسول الله صلی الله عليه وسلم  د دوی د یوه قومي اجتماعي صفت یادونه او ستاینه کړې ده او رښتیا هم چې دا ډېر ښه او ستر انساني صفت دی.

2-د حدیث د دې جملې: (أَرْمَلُوا في الغزو، أو قلَّ طعام عِيَالهم) مطلب دا دی چې د بنو اشعر قوم ځیني خلک به نېستمن شول او نورو به ګذاره کوله، بیا به دوی دا چل کوه، دې کار ته موجوده زمانه کې د مسلمانانو خپل منځي تکافل وایي چې ډېر مهم او ګټور دی او اشعریانو ډېر پخوا تطبیق کړی وو.

3-د (أرملوا في الغزو) مطلب دا دی چې نېستمن او تش لاسي به شول، د (أرمل) مادې اصل "رمل" دی یعني شګې، مطلب لاس کې به شګې او خاورې ورپاته سوې، یعني هیڅ به ورسره نه و، أرمله او أرامل عربي کې هغې ښځې ته وايي چې مېړه یې نه وي، تش لاس او غریبه اوسي.

4-(فهم مني وأنا منهم) یعني دوی په دې غوره عمل زما سره یو ځای دي، دا کار یې زما کار او زما طریقه ده، امام النووي رحمه الله وایي:  مطلب دا دی چې د دوی دا طریقه د الله ښه اطاعت او زما ښه پیروي ده.

5-حدیث نه معلومیږي چې د مسلمانانو خپلمنځي مرسته او یوه بل سره خواخوږي، له غریبانو سره خپله ډوډۍ او شتمنۍ شریکول؛ د  رسول الله صلی الله عليه وسلم  او لومړي پېر مسلمانان لاره او طریقه ده.

6-روایت کې راغلي: (ثوب واحد .. في إناء واحد) یعني د دوی کوم خلک چې ډېر څه لرې او نور یې کم لري یا هیڅ نه لري، هغه یوه څادر کې راجمعه کړي او په یوه لوښي یې ووېشي، له دې نه د اشعریانو خپلمنځي مینه او اخلاص ښه روښانه کیږي، دا د خپلمنځي مرستو بېخي دلچسپه، ګټوره او خوندوره طریقه ده، په دې سره د سوالګر او ورکوونکی ټیټ او لوړ حیثیتونه هم له منځه ځي، په یوه بل احسان بارول هم نه راځي او نورې زیاتې ګټې لري.

     زموږ ټولنه کې هم د دې نبوي لارې احیا او راژوندي کول ډېر ګټور تمامیدلی شي، که موږ چرته رښتیا خپلو کې یوه بل سره خواخوږي لرو او د مرستې اراده لرو نو دا یې تر ډېرو ښه لاره ده، دا طریقه موږ د کلیو په سطحه هم کولی شو، د خپلوانو او اباګنیو له لارې هم، او د ملګرو او انډیوالانو په سطحه هم، زما په اند دا له موجوده خیریه ټولنو او ټرسټونو ښه لاره ده. الله دې موږ ټول د خیر او ښو لاره کې ګړندي او بریالي لري.

تبصره / نظر

نظرات / تبصري

د همدې برخي څخه

شریک کړئ

ټولپوښتنه

زمونږ نوي ویبسائټ څنګه دي؟