No-IMG

د ربیعه د واده او ربیعه او ابو بکر د دعوې کیسه

    دا اصلاً دوه کیسې دي، یوه د ربیعه رضي الله عنه د واده کیسه ده او بله د ځمکې پر سر د ده او ابو بکر الصدیق رضي الله عنهما د دعوې کیسه، څرنګه چې دواړه خورا خوندورې، په زړه پورې او ګټورې کیسې دي او دواړه د المستدرک للحاکم په یوه روایت کې راغلې دي نو ما هم دواړه یو ځای راواخیستلې. دواړه کیسې ربیعه رضي الله عنه پخپله کوي او زه یې د ده له خولې راپښتو کوم. الله دې وکړي له دې کیسو څه زده او هغه عملي کړو.

د ربیعه د واده کیسه

     ربیعۀ بن کعب الاسلمي رضي الله عنه وایي: ما به د رسول الله ﷺ خدمت کاوه، رسول الله ﷺ راته وفرمایل: یا ربیعة! واده نه کوې؟ دی وایي ما ورته وویل: نه یې کوم، یا رسول الله! یو خو د واده پالنې لګښتونه نه لرم او بل داسې څه نه کوم چې ستا له خدمته مې بوخت کړي. ربیعة وایي: نو هغه مخ رانه واړوه. ما همداسې د هغه خدمت کوه، بیا یې دویم ځل راته وفرمایل: اې ربیعة! واده نه کوې؟ ما ورته وویل: نه یې کوم، یا رسول الله! یو خو د واده پالنې لګښتونه نه لرم او بل داسې څه نه کوم چې ستا له خدمته مې بوخت کړي. دی وایي: نو هغه مخ رانه واړوه.

    ربیعة وایي: وروسته مې له ځانه سره سوچ کوه چې یا رسول الله، په الله قسم کوم، چې زما د دنیا او اخرت د ګټې په چارو ته ډېر ښه پوهیږې. دی زیاتوي: له ځان سره مې وویل په الله قسم، که دا ځل یې د واده راته وویل زه به خامخا ورته وایم چې هوکې، یا رسول الله، چې ستا څنګه خوښه یې، امر راته کوه. هغه بیا راته وفرمایل: اې ربیعة! واده نه کوې؟ ما ورته وویل: هوکې، کوم یې، امر راته وکړه چې ستا څنګه خوښه یي.

    ربیعة وایي: رسول الله ﷺ راته وفرمایل: د انصارو یوه خېل کې د فلاني کورنۍ ته ورشه، هغوی به له رسول الله ﷺ نه ناوخته کیدل، هغوی ته ووایه چې زه رسول الله درته رالیږلی یم، هغه امر درته کوي چې فلانۍ (د دې کورنۍ یوه پېغله) ما ته راکوژده کړئ. ربیعة زیاتوي: زه ولاړم، هغوی ته مې وویل: رسول الله تاسو ته رالیږلی یم، هغه تاسې ته امر کوي چې ما ته فلانۍ راکوژده کړئ. هغوی وویل: رسول الله ته هرکلی وایو، د رسول الله استازي ته هرکلی وایو. په الله قسم کوو چې د رسول الله استازی به خپل مطلب ترلاسه زموږ نه ستنیږي. دی وایي هغوی ما ته کوژده وکړه، نرمي یې راسره وکړه او شاهدان یې رانه ونه غوښتل.

    ربیعة وایي: زه رسول الله ﷺ ته په داسې حال کې ورغلم چې طبیعت مې خراب او خپه وم، هغه راته وفرمایل: ربیعة! څه چل دی؟ ما ورته وویل: یا رسول الله! زه عزتمنو خلکو ته ورغلم، هغوی کوژده راته وکړه، زما یې ډېر عزت وکړ او ډېره نرمي یې راسره وکړه، هغوی زما نه شاهدان ونه غوښتل او زه مهر نه لرم. رسول الله ﷺ بریدة الاسلمي ته وفرمایل: ده ته د خورما د هډوکي هومره سره زر برابر کړه او هغوی راته برابر کړل، هغه مې راواخیستل او رسول الله ته راغلم، هغه راته وفرمایل: دا سره زر هغوی ته وروړه، ورته ووایه! دا د هغې مهر ده، هغوی ته ورغلم، سره زر مې ورکړل، مال دا د هغې مهر ده، هغوی پرې راضي شول، قبول یې کړ او ویې ویل چې دا ډېر او ښه شی ده.

     ربیعة وایي: زه بیا رسول الله ﷺ ته د خپګان په حالت کې ورغلم، هغه راته وفرمایل: ربیعة! ولې خپه یې؟ ما ورته وویل: یا رسول الله ما له هغوی نه عزتمن خلک چرته هم نه دي لیدلي، ما چې هغوی ته څه وروړل په هغه خوشاله شول، هغه یې ښه او زیات شی وباله. اوس زه د واده لپاره توی او خوړه نه لرم، هغه بریدة ته وفرمایل: ده ته یو پسه پیدا کړه، هغوی غټ او څورب پسه راته پیدا کړ. رسول الله ﷺ راته وفرمایل: عائشې ته ورشه، ورته ووایه چې هغه کوم لوښي کې چې خواړه دي هغه راکړه.

     ربیعة وایي عائشې ته ورغلم، د رسول الله خبره مې ورته وکړه، هغې وویل: په دې لوښې کې نه صاعه اوربشې دي، په الله قسم زموږ کره له دې پرته نور خواړه نشته، دا درواخله او هغه مې راواخیستل، رسول الله ته ورغلم او د عائشې خبره مې ورته وکړه، هغه راته وفرمایل:  ولاړ شه! دا هغوی ته وروړه، ورته وا دا به سهار ستاسو خوړه وي. ربیعة وایي: زه هغوی ته ورغلم، پسه مې هم راسره روان کړ، زما سره د اسلم قبیلې خلک هم وو، هغوی ته مې وویل: دا به سهار ستاسو خوړه وي او دا پسه به هم پوخ کړئ. هغوی راته وویل: ډوډۍ به موږ تیاره کړو او د پسه حلالولو او پخولو کار ستاسو پر غاړه.

    ربیعة وایي: ما او د اسلم قبیلې خلکو پسه راونیو، حلال مو کړ، څرمن مو ورنه وایستله او پوخ مو کړ، نو سهار ته مو غوښې او ډوډۍ تیاره کړه او توی یا ولیمه مو برابره کړه، رسول الله ﷺ ته مې دعوت ورکړ او هغه زما دعوت قبول کړ. رواه أحمد

د ربیعة او ابو بکر دعوه

    ربیعة بن کعب الاسلمي رضي الله عنه وایي: ما ته رسول الله ﷺ ځمکه راکړه او ابو بکر رضي الله عنه ته یې هم ځمکه ورکړه، نو زما او ابو بکر د خورما په یوه ونه سره دعوه شوه، ربیعة وایي: دنیا راغله، (دنیا او شتمني مو زیاته شوه) ابو بکر وویل: دا د خورما ونه زما په برخه کې ده، ما ورته وویل: زما په برخه کې ده. دی وایي ما ته ابو بکر یوه خبره وکړه، هغه پر ما بده ولګیدله او دی هم پرې پښېمانه شو، ربیعة وایي ابو بکر راته وویل: ربیعة! ما چې کومه بده خبره درته وکړه د قصاص لپاره ته هم هماغسې خبره راته وکړه، ما ورته وویل: په الله مې قسم، زه به هغه خبره درته ونه کړم، زه به یواځې د خیر خبره درته کوم.

    ربیعة وایي: ابو بکر راته وویل: په الله مې قسم، ما چې کومه خبر درته کړې ده ته به هم خامخا هماغه خبر راته کوې، چې قصاص شي او کنه زه رسول الله ﷺ ته شکایت کوم، ما ورته وویل: په الله مې قسم، زه به هغه خبره درته ونه کړم، زه به یواځې د خیر خبره درته کوم. ابو بکر ځمکه پرېښودله او رسول الله ته ورغی. زه هم له شا ورپسې روان شوم، د بنو اسلم قبیلې (د ربیعة قبیلة) خلکو وویل: الله دې پر ابو بکر رحم وکړي، هغه بده خبره هم درته وکړه او اوس دې رسول الله ﷺ ته شکایت هم کوي!!

    ربیعة وایي: ما هغوی ته وویل: تاسو دا پېژنئ؟! دا ابو بکر دی! د دوو دویم (ثَانِي اثْنَيْنِ) یعني د قران په وینا د رسول الله د هجرت ملګری. دا د مسلمانانو سپینږیری دی، پام کوئ، هغه راونه ګوري، نو وبه مو ویني، فکر به وکړي چې تاسو زما مرسته کوئ، نو غوسه به شي، دی چې رسول الله ته د غوسې حالت کې ورشي هغه د ده د غوسې له امله غوسه کیږي او د دوی دواړو د غوسې له امله الله جل جلاله غوسه کیږي او په دې صورت کې ربیعة هلاکیږي. نو هغوی رانه وګرځیدل. او زه په ابو بکر پسې له شا روان وم. څو رسول الله ته ورسیدی.

     هلته یې رسول الله ﷺ ته زما او ده د جنجال کیسه وکړه، هغه ما ته وفرمایل: اې ربیعة! ستا او صدیق څه کیسه ده؟ ما هم د ابو بکر په څېر کیسه ورته وکړه مال داسې او هاسې کیسه وه. هغه راته وفرمایل: ده چې کومه بده خبره درته کړې وه ته هم هماغسې خبره ورته وکړه، ما انکار وکړ، رسول الله ﷺ راته وفرمایل: ښه، د هغه په څېر خبره مه ورته کوه، بلکې ورته ووایه چې ابو بکره! الله دې بښنه درته وکړي. ربیعة وایی همداسې مې ورته وویل، نو ابو بکر  رضي الله عنه وګرځیدی او ژړل یې. رواه الحاكم في المستدرك وقال: هَذَا حَدِيثٌ صَحِيحٌ عَلَى شَرْطِ مُسْلِمٍ، وَلَمْ يُخْرِجَاهُ‏.‏ و رواه أحمد في مسنده

یادونه: راتلونکي کې په لنډه توګه د دې دواړو کیسو ګټې هم لیکم، ان شاء الله او تاسو هغه زړه خبره مه هېروئ یعني  "ولوستل شوه"

تبصره / نظر

نظرات / تبصري

د همدې برخي څخه

شریک کړئ

ټولپوښتنه

زمونږ نوي ویبسائټ څنګه دي؟