No-IMG

حکمتيار: د بهرنيو ځواكونو ايستلو موده دي رالنډه شي

متن خطبه مشر معزز(جمعه 17 ثور 1400)

الحمد لله و كفى و سلام على عباده الذين اصطفى و بعد: فاعوذ بالله من الشيطن الرجيم بسم الله الرحمن الرحيم

وَهُوَ ٱلَّذِي كَفَّ أَيۡدِيَهُمۡ عَنكُمۡ وَأَيۡدِيَكُمۡ عَنۡهُم بِبَطۡنِ مَكَّةَ مِنۢ بَعۡدِ أَنۡ أَظۡفَرَكُمۡ عَلَيۡهِمۡ ۚ وَكَانَ ٱللّٰهُ بِمَا تَعۡمَلُونَ بَصِيرًا ٢٤ وَلَوۡلَا رِجَالٞ مُّؤۡمِنُونَ وَنِسَآءٞ مُّؤۡمِنَٰتٞ لَّمۡ تَعۡلَمُوهُمۡ أَن تَطَ‍ُٔوهُمۡ فَتُصِيبَكُم مِّنۡهُم مَّعَرَّةُۢ بِغَيۡرِ عِلۡمٖ ۖ لِّيُدۡخِلَ ٱللّٰهُ فِي رَحۡمَتِهِۦ مَن يَشَآءُ ۚ لَوۡ تَزَيَّلُواْ لَعَذَّبۡنَا ٱلَّذِينَ كَفَرُواْ مِنۡهُمۡ عَذَابًا أَلِيمًا الفتح: 24- 25 صدق الله العظيم

اجازه راكړئ د دې مباركو آيتونو له ترجمې او تفسير وړاندي د څو مهمو ورځنيو قضاياوو په اړه مختصر عرائض ولرم.

د هېواد وضعيت داسي دئ چي له يوې خوا جگړي تشديد شوې او له بلي خوا د سولي هڅي له خنډ او ځنډ سره مخامخ دي. د جگړو د تشديد لمن نږدې شلو ولايتونو ته غزېدلې؛ داسي وحشتناكي پېښي هم رامنځته شوې چي په تېرو كلونو كي ئې لږ مثالونه مومو. لكه د لوگر وحشيانه انفجار چي له كبله نږدې يو سل دېرشو ملكي افغانانو ته مرگ ژوبله واوشته؛ دېرش ئې وژل شوي!! ټول د يوې سيمي او د يوه توكم؛ وسله والو مخالفينو ئې هم مسئوليت نه دئ منلى!! دا په سنگر او د جنگ سيمي كي نه دي وژل شوي؛ د دولت تر واك لاندي ښار او په يوې غونډي كي وژل شوي؛ ډېرى ئې محصلين وو!! طبيعي ده چي د دې ستر جنايت ترشا به د هغو لاس وي چي د هم سولي مخالف دي او هم د قومي تعصب او فاشيستي زهرجنو افكارو په سرطان اخته دي؛ او مأموريت ئې قومي جنگونو ته لمن وهل؛

همدا راز په ارغنداب كي داسي جنايات شوي چي په اورېدو ئې د انسان وېښتان ورته ځيږ شي. هلته د سيمي د تصفيې تر نامه لاندي عمليات پيل شول، نږدې درې مياشتي ئې دوام وكړ؛ په مسلسله توگه پرې بمونه او راكټونه وورېدل؛ ټوله سيمه په كنډوالې بدله شوه؛ د شپې او ورځي هر خوزېدونكى؛ انسان او حيوان، ښځينه او نارينه؛ په نښه كېدل؛  عمليات په ژمي كي ترسره شول، ويل كېږي تر دوه زره زيات افغانان په كي وژل شوي؛ هغه چي ژوندي پاته شوي؛ دومره توانېدلي چي خپل سر ئې ايستلى؛ هر څه؛ حتى څادر او واسكټ هم ترې پاته شوي.

له يوې خوا متحده ايالات د خپلو ځواكونو د ايستلو لپاره تيارى نيسي؛ د هوا او زمكي له لاري ئې د نظامي تجهيزاتو د ايستلو لړۍ پيل كړې؛ ناټو هم اعلان كړى چي له أمريكا سره يو ځاى افغانستان ته تللي او يو ځاى به وځي؛ خو له بلي خوا گورو چي فرانسه؛ دا له اسلام سره په دښمنۍ كي تر نورو وړاندي اروپايي هېواد؛ د شرارت لار غوره كړې او زموږ هېواد كي د يوه بل جنگ پيلولو هڅي رواني كړې!!  

كه څه هم د متحده ايالاتو له لوري د خپلو ځواكونو د ايستلو پرېكړي په سوله غوښتونكو افغانانو كي د جگړي پاى ته رسېدو هيلي راټوكولې؛ خو كه افغانان له درايت او حكمت كار وانه خلي؛ كېدى شي دا وضعيت موږ د يوه بل جنگ لوري ته بوځي؛ دا بايد عادي ونه نيسو چي ځيني د جنگ شعارونه وركوي؛ له مخكنيو قومندانانو د خپلو جنگياليو فهرستونه راغونډوي او د وسلو او پيسو ژمني ورسره كوي؛ كه څه هم دا جنگ غوښتونكي په تېرو څو لسيزو كي د نظام برخه وو؛ د شوروي اتحاد لپاره هم جنگېدلي او د ناټو تر قومندې لاندي هم؛ او د دواړو د ماتي او ناكامۍ باعث هم همدا سپېره اجير جنگيالي وو؛ دوى نه د جنگ توان لري او نه همت؛ فقط د جنگ غوښتونكو خطرناكو استخباراتي شبكو لپاره د سوند مواد دي. اندېښنه مو بايد له دغو ځواكمنو شبكو وي نه له دغو سپېرو اجيرانو!!

وروڼو خوېندو!

د أمريكا فارن افيرز نشريې؛ د افغانستان جمهور رئيس اشرف غني ته منسوب ليكنه خپره كړې؛ په دې ليكني كي ځيني مهم مطالب تر سترگو كېږي چي كه همدا د حكومت د نوي دريځ محور شي نو كېدى شي سولي ته د رسېدو په بهير كي ممد ثابت شي.

مهم او د پام وړ مطالب ئې دا دي:

1.            د يوه انتقالي حكومت له تشكيل او هغه ته د قدرت له انتقال سره توافق.

2.            دا چي د دې انتقالي حكومت موده به لنډه وي؛ په همدې مودې كي به داسي انتخابات ترسره كېږي چي هم د جمهوري رياست انتخابات احتوى كړي او هم پارلماني او د محلي شورى گانى انتخابات

3.            دې ليكني كي د بهرنيو ځواكونو د ايستلو پرېكړي هم حمايت شوى.

دا هغه څه دي چي كه ټول لوري په صادقانه توگه ورسره توافق وكړي؛ له شك پرته د بحران په حل كي زموږ مرسته كولى شي.

طالبانو ته په كار ده چي دې ته د يوه ښه فرصت په سترگه وگوري؛ همدې ته په پام سره دي؛ د بحران د حل په ارتباط خپله نوې طرح تدوين او په واضحو الفاظو اعلان كړي او خپلي أساسي غوښتني دي مشخص كړي.

څو معقولي غوښتني درلودى شي چي ځيني ئې په افغانانو پوري مربوطي دي او ځيني په أمريكا پوري؛ صحيح نه ده چي په أمريكا پوري تړلې غوښتني؛ د افغانانو تر منځ د مذاكراتو او روغي جوړي مانع شي؛ مخصوصاً اوس چي بهرني ځواكونه عملاً د وتلو په حال كي دي.

له بهرنيو ځواكونو د دوى غوښتني دا كېدى شي:

4.            د ځواكونو ايستلو موده دي رالنډه شي.

5.            د امارت إسلامي د مشرانو نومونه دي د أمريكا له تور فهرست حذف شي.

6.            د جنگي غرامتونو مطالبه؛ دا هغه څه دي چي هر مؤمن او باهمته أفغان بايد د هغه جدي غوښتنه وكړي، له ټولو هغو هېوادو چي دا جگړه ئې په تېرو څلورو لسيزو كي پر افغانانو تپلې، بمونه او راكټونه ئې پر افغانانو ورولي او د دوى هېواد ئې وران كړى.

په دې غوښتني كي به ډېرى افغانان د دوى ملاتړ كوي.

له افغانانو ئې غوښتني بايد دا وي:

•             د اوسني حكومت تعويض؛ په داسي حكومت چي ټولو ته د منلو وړ وي. د فارن افيرز ليكنه ښيي چي له دې غوښتني سره د كابل حكومت زعامت هم موافق دئ.

•             د دوى دوهمه غوښتنه به دا وي چي ټول زندانيان ئې آزاد شي.

دا دوه وروستنۍ غوښتني بايد په بين الافغاني مذاكراتو كي وړاندي شي. اوربند دي په همدې پوري مشروط كړي؛ موقت اوربند دي اعلان شي؛ په همدې موده كي دي هم نوى حكومت جوړ او قدرت ورانتقال شي او هم ټول زندانيان خوشي شي. كه دا دواړه غوښتني عملي شوې؛ نو موقت اوربند دي په دائمي اوربند بدل شي.

وروڼو خوېندو!

په هغو مباركو آيتونو كي چي د خطبې په پيل كي مي تلاوت كړل؛ قرآن خپل مؤمن مخاطب ته د مكې د فتحي په اړه داسي لارښووني كوي چي په كار ده د ښارونو د نيولو په ارتباط ئې هر مجاهد فرد او زعيم په كلكه مراعات كړي.

الله تعالى فرمايي:

وَهُوَ ٱلَّذِي كَفَّ أَيۡدِيَهُمۡ عَنكُمۡ وَأَيۡدِيَكُمۡ عَنۡهُم بِبَطۡنِ مَكَّةَ مِنۢ بَعۡدِ أَنۡ أَظۡفَرَكُمۡ عَلَيۡهِمۡ ۚ وَكَانَ ٱللّٰهُ بِمَا تَعۡمَلُونَ بَصِيرًا.

او الله هغه ذات دئ چي د مكې دننه ئې د دوى لاسونه له تاسو تم كړل او ستاسو لاسونه له دوى، له هغه وروسته چي تاسو ئې پرې برلاسي كړئ، او الله د هغه څه ښه ليدونكى وو چي تاسو كول،

دا مبارك آيت د حديبې د پېښي هغه وضعيت ته اشاره كوي چي تر معاهدې وړاندي داسي حالت رامنځته شو چي نږدې وه خونړۍ جگړه پيل شي؛

الله تعالى د قريشو او مسلمانانو تر منځ د نښتي مخنيوى وكړ، دا په داسي حال كي چي د قريشو جنگياليو په وار وار د دې هڅه كوله چي مسلمانان وپاروي او نښته رامنځته كړي، څو ځلي ئې غلچكي بريدونه وكړل، هر ځل ونيول شول او رسول الله صلى الله عليه و سلم بېرته پرېښودل، يو ځل د دوى څلوېښتو پنځوسو كسانو د شپې له لوري د مسلمانانو پنډغالي ته ډبري او غشي وار كړل، ټول د صحابه وو له لوري ونيول شول خو رسول الله صلى الله عليه و سلم ټول خوشي كړل، بل ځل اتيا كسانو د گهيځ لمانځه پر مهال ناڅاپي بريد وكړ، دوى هم ونيول شول او رسول الله صلى الله عليه و سلم پرېښودل، په دې توگه د قريشو هره هڅه شنډه شوه. په دې آيتونو كي دغو پېښو ته اشاره شوې او ويل شوي: دا خو الله تعالى وو چي د مكې دننه ئې د دوى لاسونه له تاسو راتم كړل او ستاسو لاسونه له دوى، له هغه وروسته چي تاسو ئې پرې برلاسي كړئ.

ورپسې فرمايي:

وَلَوۡلَا رِجَالٞ مُّؤۡمِنُونَ وَنِسَآءٞ مُّؤۡمِنَٰتٞ لَّمۡ تَعۡلَمُوهُمۡ أَن تَطَ‍ُٔوهُمۡ فَتُصِيبَكُم مِّنۡهُم مَّعَرَّةُۢ بِغَيۡرِ عِلۡمٖ ۖ لِّيُدۡخِلَ ٱللّٰهُ فِي رَحۡمَتِهِۦ مَن يَشَآءُ ۚ لَوۡ تَزَيَّلُواْ لَعَذَّبۡنَا ٱلَّذِينَ كَفَرُواْ مِنۡهُمۡ عَذَابًا أَلِيمًا.

او كه هغه مؤمنان نارينه او مؤمني مېرمني نه وى چي تاسو نه پېژندل؛ داسي نه چي په ناپوهۍ سره ئې ترپښو لاندي كړئ او د دوى له كبله به تاسو ته په ناخبرۍ كي پېغور متوجه شي، د دې لپاره چي الله هغه څوك په خپل رحمت كي داخل كړي چي دى ئې غواړي، كه (ترې) بېل شوي وى نو د دوى هغه به مو په دردناك عذاب اخته كړي وو چي كفر ئې كړى.

نه يوازي دا چي الله تعالى غوښتل هغه مؤمنان صدمه ونه گوري چي مسلمانانو نه پېږندل؛ كه جگړه رامنځته شوې وى نو دوى به په ناپوهي كي صدمه رسېدله؛ همداراز الله تعالى غوښتل د مكې ډېر استوگن د ايمان له سعادت برخمن شي، كه هغه مؤمنان او دغه چي د ايمان سعادت به ئې په راتلونكي كي په برخه كېدو له قريشو بېل شوي وى نو الله تعالى به د قريشو كافران په دردناك عذاب اخته كړي وو.   

دې ته مو پام بايد وي چي دا مبارك آيت يوازي د هغه حالت په توضيح پوري محدود نه دئ بلكي له دښمن سره د جنگ او نښتو د څرنگوالي په اړه يوه الهي لارښوونه زموږ په وړاندي ږدي، د دې او دې ته ورته قرآني لارښوونو له مخي مسلمانان مكلف دي چي له دښمن سره د نښتو په دوران كي دې ټكي ته په كلكه توجه وكړي چي بې وزلي مسلمانان په ناپوهۍ كي ترپښو لاندي نشي او صدمه ورونه رسېږي، نه يوازي د داسي مسلمانانو په اړه بايد جدي اهتمام وكړي بلكي د هغو په اړه هم بايد اندېښمن وي چي كېدى شي په راتلونكي كي ايمان راوړي، البته دا لارښوونه د داسي حالت اړوند لارښوونه ده چي د جگړي ابتكار د مسلمانانو په لاس كي وي، د بريد وخت او څرنگوالى د دوى له لوري ټاكل كېږي، بريد يا دفاع ته اړ شوي نه وي، ځنډول ئې دوى ته كوم تاوان نه رسوي او د دښمن په گټه نه منتج كېږي.

قرآن موږ ته دا لارښوونه هم كوي چي كه ستاسو محارب دښمن؛ حتى هغه چي تاسو ئې له مسجد الحرام ايستلي يئ؛ د حج او عمرې په موخه د مكې په لور روان وي او ستاسو له سيمي تېرېږي بايد د هغوى مزاحم نه شئ.

سبحانك اللهم بحمدك نشهد ان لااله الا انت نستغفرك و نتوب اليك

تبصره / نظر

نظرات / تبصري

د همدې برخي څخه

شریک کړئ

ټولپوښتنه

زمونږ نوي ویبسائټ څنګه دي؟