No-IMG

دا ژوند دی او همدا د ژوند ټوله قصه

د ګوګل په سرچ خونه کې د 1922 کال د انځورونو البوم وګورئ؛ عجيب خلک به په کې پيدا کړئ، د اروپا، امريکا او آسیا خلک دي، ژوند دی، څوک چکرې وهي او ميلې کوي، څوک ملاقاتونه کوي، دفترونه دي، بنډارونه دي، بازارونه له خلکو ډک دي، ډېر يې په يو لوی ميدان کې راټول دي، جلسې کوي، ځينې ميندې خپل ماشومان مکتبونو ته لېږي، څوک په فصلونو او باغونو کې مصروف دي، بس ټول د ژوند د هيلو پوره کولو په خاطر خواري او زحمت کوي، مګر نن 2022 چې پوره سل کاله پرې تېر شوي دي، څه فکر کوئ؛ څومره به ترې ژوندي وي؟!

يقيناً چې ټول مړه دي، که يو نيم څوک په استثنائي ډول ژوندی وي، دومره به زوړ وي چې خپله به د مرګ ارمان کوي!

لږ مخکې مې يو چېرې ولوستل چې کوم انګريز په 1922 کې د خاطرو په کتابچه کې ليکلي و چې سل کاله وروسته په راتلونکي 22 کال کې به زما په ګډون هيڅ څوک ژوندی نه وي پاتې!

باور وکړئ، ما ته د نن نه سل کاله وروسته يعنې د 2122 کال راپه زړه شو، هيښ پاتې شوم، همدا زما په شمول تاسو کې هر يو چې دا پوسټ لولئ، يو به هم ژوندی نه وي!

زمونږ ځايونه به نورو خلکو نيولي وي، مونږ ټول به د قبرونو ميلمانه يو، داسې چې تش هډوکي به مو پاتې وي، که يو نيم چا په دعاګانو کې ياد کړلو هغه؛ ګنې څوک به مو په قصه کې هم نه وي، کټ مټ لکه زمونږ او ستاسې د نيکونو په څېر چې هېر کړي مو دي!

مطلب دا ژوند دی او همدا د ژوند ټوله قصه!

د خدای په لحاظ! د دې مختصر او بې باوره ژوند په خاطر د نورو هيلې مه اخلئ، مونږ د قيامت په حساب او کتاب باور لرو، د ذرې ذرې حساب به اخيستل کېږي، د يو يو لفظ او کلمې پوښتنه به کېږي، ﴿مَّا يَلۡفِظُ مِن قَوۡلٍ إِلَّا لَدَيۡهِ رَقِيبٌ عَتِيدٞ﴾ (١٨)  ق

ژباړه: انسان هيڅ لفظ نه ادا کوي مګر ورسره يو بیداره او ويښ څارونکی شته (چې څاري يې).

د دې دوه ورځې ژوند په خاطر له خپلو وروڼو، خويندو، مېرمنو، د کاکا، ماما، عمه او خاله زامنو سره منفي سيالي مه کوئ، قسم په لوی خدای چې دا ژوند په دې سيالۍ نه ارزي، يوازې سوله او مينه ده چې ارزښت لري، مينه وويشئ، په هر کار کې عدالت وکړئ، د خپل توان تر کچې مخلوق ته خير ورسوئ، همدا زمونږ د ټولو په کار راځي، راځئ چې ځانونه بدل کړو، په خپلو بدو کړنو او بدو ارادو له خدايه مغفرت وغواړو، همدا لوی کار دی، الله تعالی فرمايي: ﴿وَمَا تُقَدِّمُواْ لِأَنفُسِكُم مِّنۡ خَيۡرٖ تَجِدُوهُ عِندَ ٱللَّهِ هُوَ خَيۡرٗا وَأَعۡظَمَ أَجۡرٗاۚ وَٱسۡتَغۡفِرُواْ ٱللَّهَۖ إِنَّ ٱللَّهَ غَفُورٞ رَّحِيمُۢ﴾(٢٠)  المزّمّل

ژباړه: هغه د خير کړنې (نيک اعمال) چې تاسو يې د خپلو ځانونو لپاره مخکې لېږئ؛ له الله تعالی سره به يې وګورئ، همدا خير او د اجر په حساب ډېر لوی کار دی، له خدايه بښنه وغواړئ، هغه بښونکی رحيم ذات دی.

ژوند

تبصره / نظر

نظرات / تبصري

د همدې برخي څخه

شریک کړئ

ټولپوښتنه

زمونږ نوي ویبسائټ څنګه دي؟

زمونږ فيسبوک