بسم الله الرحمن الرحيم

سريزه

په داسي حال كي چي موږ د اسلامي امت يووالى غواړو، د امت پر هغو ژورو ژورو پرهارونو وير كوو او اوښكي تويوو چي ستر عامل ئې قومي او مذهبي اختلافات ول، د همدغو كرغېړنو اختلافاتو له كبله ټوټې ټوټې او له ذلت او سپكاوي سره مخامخ شو، هيله مو دا ده چي اسلامي امت د الله تعالى پر مضبوطي رسۍ منگولي ولگوي، متحد شي، خپل تېر برم او عظمت تر لاسه كړي، د ټولو حقه مذاهبو صادق او مؤمن پلويان يو ځل بيا د متحد او تفرق نه منونكي امت په توگه راڅرگند شي؛ د وروڼو په څېر يو د بل خوا ته په ډاډ او اطمئنان سره او له كركي او دښمنۍ پرته ژوند وكړي، نه يو بل تكفير كړي، نه په فروعي مسائلو كي اختلاف د دوى تر منځ په دښمنۍ واوړي، نه اصلي مسائل هېر كړي او په فروعي مسائلو پوري ونښلي، نه ستر ستر خطرناك بهرني او كورني دښمنان له پامه وغورځوي او هغوى ته شا كړي او په داسي شخړو كي ځان مصروف كړي چي د مسلمانانو تر منځ له فروعي اختلافاتو راولاړېږي، موږ غوښتل چي افغان ولس په يوه ډاډمن او متحد اسلامي صف كي راغونډ كړو، پرې نږدو چي افغانان؛ مخصوصاً هغه چي خپلواك، آزاد او سرلوړى اسلامي افغانستان غواړي او دې سپېڅلي هدف ته د رسېدو لپاره هري قربانۍ ته چمتو دي؛ په بېلو بېلو ډلو ووېشل شي، غوښتل مو د دوى سنگر يو وي، د اسلام دوست ئې دوست او دښمن ئې دښمن وي، په گډه د كورنيو او بهرنيو دښمنانو مقابله وكړي، توره ئې د دښمن پر سر راپرېوځي، ژبه ئې د دښمن په ضد وخوځي، قلم ئې د دښمن په ضد وليكي، خو متأسفانه ځيني كمعقله او غرضي كړۍ د داسي هيلو په وړاندي خنډونه راولاړوي، په داسي حال كي چي موږ له لوى دښمن سره په ساړه او تاوده جنگ كي مصروف يو، په داسي حال كي چي نن د تاريخ تر ټولو لوى او اوږد سوړ او تود جنگ د اسلام او اسلامي امت په ضد روان دئ، د مسلمانانو په ضد د نړۍ ټول كفري ځواكونه متحد شوي او د اسلامي هېوادو منافق او مفسد غلام صفته حكام هم ورسره ملگري شوي، د كابل او بغداد په څېر د اسلام ستري كلاگاني د دښمن په لاس كي پرېوتې، په همدې ويرجن او دردناك حالت كي ځيني وايي: موږ په مقلدو مذهبيانو پسي ورروان يو او سنگرونه ئې ترې نيسو!! ځيني وايي: د مذهب تقليد شرك دئ، ځيني وايي: د احنافو په طريقه لمونځ كول لمونځ نه دئ، د دوى لمونځ د سنت خلاف دئ او الله تعالى ئې نه قبلوي!! ځيني وايي: له سنتو وروسته دعاء څنگه ده؟ او دې ته ورته نور مسائل. دښمن خوښ دئ او دا غواړي چي مسلمانان په دغسي قضاياوو كي مشغول وساتي، يقيناً چي د دغه بهير تر شا يا د زرنگ دښمن ناولي لاسونه د فتنو راولاړولو په موخه بوخت دي او يا هغه كمعقله او په غرض او مرض ككړ خلك چي نه د دين په حقيقت پوهېږي او نه د دنيا له حالته خبر دي، نه دوست پېژني او نه دښمن، نه د اسلام غم ورسره دئ او نه د اسلامي امت درد.

موږ دا كتاب په دې موخه خپروو چي دا توطئه شنډه كړو، د دغو مرموزو كړيو د تبليغاتو مخه ونيسو، ټولو ته جوته كړو چي موږ غواړو عقيده، مذهب، مسلك، لمونځ او ټول عبادات او معاملات مو سل په سلو كي د قرآن او سنت مطابق وي، يوازي هغه څه منو او عمل پرې كوو چي د الله تعالى د كتاب او د رسول الله ﹽ له لارښوونو سره مطابقت ولري. هر مسلمان خپل ورور گڼو، د ټولو حقه مذاهبو پلويانو ته درناوى لرو، شافعي، مالكي، حنبلي، سلفي او هر هغه څوك زموږ ديني ورور دئ چي د الله كتاب قرآن ئې لارښود دئ او د رسول الله ﹽ سنت ئې تگلاره دئ، خپلو وروڼو ته وايو: په فرعي مسائلو كي اختلاف دي تاسو د هغو خلكو په اړه دښمنۍ، حساسيت او ضديت ته اړه نه كړي چي په اصلي مسائلو كي له تاسو سره متحد دي، خپل وخت له هغو خلكو سره په شخړو، مشاجرو او مجادلو كي مه ضايع كوئ چي اصلي دښمن ئې هېر كړى، اصلي كار ئې پرېښى، د دښمن په ضد د جهاد سنگر ترې پاته دئ، د مسلمانانو په ضد ئې د جدل سنگر پرانيستى او د دوى په ضد د خولې ډزي كوي. پر دوى زړه سوى ولرئ او ورته ووايئ: كه گمان كوې چي په فرعي مسائلو د تركيز له لاري به د الله تعالى رضا ترلاسه كړې او جنت الفردوس به دي په برخه شي، نو خپل شوق پوره كړه، خو په دې پوه شه چي نه د الله تعالى رضاء په دومره آسانۍ ترلاسه كېدى شي او نه جنت دومره ارزانه متاع ده چي په څو وړو او سړو خبرو واخيستى شي، د قرآن دغه آيت ئې مخي ته كېږدئ:

    •                                                                                                             آل عمران:142

آيا داسي مو انگېرلې چي جنت ته به له هغه د مخه داخل شئ چي لا الله نه ستاسو مجاهدين معلوم كړي او نه ئې صابران معلوم كړي؟!!

يعني دا هسي يوه خوشې هيله او بې بنسټه انگېرنه ده چي تاسو به يوازي د ايمان په دعوى سره جنت ته درومئ او د جنت دروازې به په خپلي مخي كي پرانيستې مومئ، مخكي له دې چي له آزموينو تېر شئ، په امتحانونو كي بريالي شئ او د آزموينو په ترڅ كي جنت ته د ننوتو وړتيا ثابته كړئ!! دا هيله د الله له سننو سره اړخ نه لگوي، الله جنت د هغو لپاره جوړ كړى چي په آزموينو كي بريالي شي، جنت د مجاهدينو او صابرانو ځاى دئ، په آزموينو كي الله تعالى دا عملاً څرگندوي چي څوك مجاهد او صابر دئ او د جنت مستحق. له دې آيت داسي معلومېږي چي له (مجاهد) او (صابر) پرته بل څوك جنت ته نشي ننوتى. او له دې دا خبره معلومېږي چي د (جهاد) او (صبر) لمن ډېره پراخه ده، او د انسان ټول ژوند احتوى كوي.

د حديث او سنت په اړه موږ له دوو (مُنكِرينو او مُنَكِّرينو) ډلو سره مخامخ يو، يوه ئې انكار كوونكې او بله ئې انكاروونكې، يوه ئې په خپله له حديث او سنت نه انكار كوي، بله ئې نور انكار ته اړباسي، اسلام ته د دوهمي ډلي خطر تر لومړۍ زيات دئ، هغه چي هر وچ او لانده د حديث په نامه وړاندي كوي، رسول الله ﹽ ته متضاد او متعارض اقوال او افعال منسوبوي، داسي څه ورته منسوبوي چي هم د قرآن خلاف وي او هم د عقل، رسول الله ﹽ په داسي صفاتو يادوي چي الله تعالى نه دئ پرې ستايلى، دوى له سنت او اسلام سره تر هر چا زياته دښمني كوي، له سنت نه انكار نه بازار لري او نه په امت كي د نفوذ مجال، خو متضاد او متعارض روايات هم بازار لري، هم په امت كي د خورېدو مجال، او هم د اختلافاتو راولاړولو توان، ډېر كمعقله دښمن به دا هڅه كوي چي له حديث او سنت نه د انكار لار غوره كړي او له دې لاري اسلام ته كوم تاوان ورسوي، دښمن هغه ډلي خوښوي، جوړوي او پالي چي د دين او مذهب په نامه د دين جرړي پرې كړي، له دين او مذهب نه داسي تعبير وړاندي كړي چي د هر چا كركه راپاروي. موږ ټول امت او د امت مجاهد علماء، هدفمن دعات او د اسلام هر دردمن خواخوږى دې ته رابلو چي راوړاندي شي او د دغو فتنو د مقابلې لپاره ملا وتړي. موږ له هيڅ واقعي مسلمان سره، كه د كوم مذهب پلوي وي او يا سلفي وي هيڅ ستونزه نه لرو، غواړو ټول په يوه صف كي راغونډ شي، ستونزه مو له هغو كړيو سره ده چي د مرموزو شبكو له لوري استخدامېږي او غواړي د مذهب تر نامه لاندي په مسلمانانو كي اختلافات راولاړ كړي او له اصلي دښمن او اصلي كار نه ئې مخ بل لوري ته واړوي.

حزب اسلامي دغه لار غوره كړې، د امت د راويښولو، په يوه صف كي د ټولو مسلمانانو د راغونډولو او په گډه د ټولو كورنيو او بهرنيو دښمنانو د مقابلې لپاره ئې د چمتو كولو ملا تړلې، د دغي تگلاري له امله وو چي نه يوازي د افغان ولس اكثر صالح او هوښيار مجاهدين او د اسلام دردمن او هدفمن خواخوږي د حزب په ليكو كي تنظيم شول بلكي د افغانستان ډېرى مخلص مذهبيان او سلفيان له حزب سره يو ځاى شول او افغانستان ته له نورو هېوادو راتلونكو رضاكارو مجاهدينو به هم دا غوره گڼله چي د حزب په سنگرونو كي او د حزب اسلامي د مجاهدينو په څنگ كي جهاد وكړي.

اللهم ارنا الحق حقاً وارزقنا اتباعه

و ارنا الباطل باطلا وارزقنا اجتنابه

حكمتيار