نن افغانستان، د ډېرو افغانانو په باور، له بهرني اشغال پرته یو خپلواک هېواد دی
ځینې کمونیستان او سیکولران د خپلو شخصي او سیاسي سیالانو پر ضد له خپلو مېرمنو او ځوانو نجونو څخه د سیاسي او تبلیغاتي موخو لپاره ناسمه استفاده کوي.
هیله نجیب الله د خپل مرحوم پلار نږدې پرچمي او کمونیستي ملګري ډیر په سیستماتیک ډول په ناسمه او غلطه توګه کاروي.
داسې ښکاري چې هیله نجیب الله ته د خپل پلار، ډاکټر نجیب الله، د وژل کېدو د اصلي لاملونو او د هغه د قاتلینو په اړه بشپړ معلومات نشته. ښه به وي چې نوموړې د خپل پلار د واکمنۍ، سیاسي کړنو، فعالیتونو، ظلمونو او د ژوند په وروستیو کلونو کې د هغه د ناکامو او پرديپالو سیاستونو په اړه ژوره څېړنه وکړي، څو د خپل پلار د سیاسي او تاریخي میراث، کمونیستي مفکورې او د هغه د وژل کېدو د عواملو په اړه لا ښه پوهه ترلاسه کړي.
حقیقت دا دی چې ډاکټر نجیب الله ته د افغانستان د مجاهدینو مشرانو او د هېواد د ولس له لوري د ملي روغې جوړې او عمومي عفوې فرصت ورکړل شوی و. د افغانستان مجاهد ولس هغه دې ته اړ کړ چې ځانګړو سیاسي توافقاتو ته غاړه کېږدي او په پای کې یې د مجاهدینو ځینې سیاسي او ملي طرحې ومنلې.
د ځینو روایتونو له مخې، ډاکټر نجیب الله د خپلو نږدې پرچمي ملګرو د سیاسي اختلافاتو او کودتايي هڅو په پایله کې منزوي شو او وروسته د همدغو کړیو د سیاستونو او اقداماتو له امله له سخت برخلیک سره مخامخ شو. د دغو روایتونو له مخې، نوموړی د خپلو نږدې پرچمي جنرالانو د اقداماتو او سیاسي معاملو قرباني شو.
که نن هیله نجیب الله د مجاهدینو پر سیاسي فعالیتونو نیوکې کوي، نو ښه به دا وي چې لومړی د خپل پلار د واکمنۍ سیاسي فعالیتونه، تګلارې او د هغه دورې ټول تاریخي اړخونه په بېطرفه او منصفانه ډول وارزوي.
اغلې هیله نجیب الله! د افغانستان اوسنی وضعیت باید د خپل پلار د واکمنۍ له دورې سره په مستقیم ډول پرتله نه شي. ستاسو د منتقدینو په اند، ډاکټر نجیب الله د شوروي اتحاد له ملاتړ څخه برخمن و او د هغه د واکمنۍ پر مهال میلیونونه افغانان د جګړو، وژنو، بېځایه کېدو او مهاجرت له ستونزو سره مخ شول.
نن افغانستان، د ډېرو افغانانو په باور، له بهرني اشغال پرته یو خپلواک هېواد دی، او د دې هېواد د ازادۍ او خپلواکۍ په مبارزه کې د مجاهدینو رول د معاصر افغانستان د تاریخ یوه مهمه برخه ګڼل کېږي.
