اسرائیل په متحده عربي اماراتو کې داسې پرمختللي دفاعي او څارنیز سیستمونه ځای پر ځای کړي دي
که پر ایران برید وشي، نو متحده عربي امارات به یوازې یو بېطرف نندارچي نه وي، بلکې په عملي ډول به د اسرائیل ملاتړ وکړي. ډېر خلک ښايي خبر نه وي چې د سیاسي اړیکو تر څنګ، د اماراتو او اسرائیل ترمنځ قوي دفاعي او استخباراتي تړونونه هم شته.
اسرائیل په متحده عربي اماراتو کې داسې پرمختللي دفاعي او څارنیز سیستمونه ځای پر ځای کړي دي چې اصلي هدف یې د ایران فعالیتونه تر نظر لاندې ساتل او د ایران له لوري د اسرائیل پر لور د هر ډول برید مخنیوی دی. په دې سیستمونو کې د Barak MX توغندیز دفاعي سیستم، د SPYDER هوايي دفاع سیستم، پرمختللي رادارونه لکه Green Pine او EL/M-2084 شامل دي، چې توغندي، ډرونونه او الوتکې له ډېر لرې څخه کشف او تعقیبولی شي. سربېره پر دې، د ډرونونو د شنډولو لپاره ځانګړي سیستمونه، د سایبري جاسوسۍ لپاره پرمختللي سافټویرونه، او د سمندر د څارنې لپاره بېپیلوټه کښتۍ هم کارول کېږي. دا ټول سیستمونه د منځني ختیځ د ګډ هوايي دفاعي شبکې برخه دي.
د متحده عربي اماراتو استخباراتي رول یوازې په ایران پورې محدود نه دی. امارات د سعودي عربستان، قطر او حتی عمان په اړه هم پراخه څارنه کوي، ځکه د خلیج هېوادونو ترمنځ د باور کچه ټیټه ده او هر هېواد د بل نیتونو ته په شک ګوري.
په بحرین کې بیا وضعیت لا حساس دی. هلته د شیعه وګړو شمېر ډېر دی او ایران تل هڅه کړې چې خپل نفوذ پراخ کړي. همدې وېرې ته په کتو، سعودي عربستان کلونه مخکې خپل پوځ بحرین ته واستاوه، څو واک د شیعهپاله حکومت لاس ته ونه لوېږي. خو اوس شرایط بدل شوي، سعودي عربستان ورو ورو شاته کېږي، او دا بدلون ښايي په بحرین کې نوې سیاسي او امنیتي معادلې رامنځته کړي.
په ټوله کې، که سیمه جګړې ته نږدې شي، متحده عربي امارات به یوازې سیاسي ملاتړ نه، بلکې د استخباراتو، دفاعي سیستمونو او تخنیکي امکاناتو له لارې به د اسرائیل تر څنګ ولاړ وي — هغه ملاتړ چې اغېزې به یې پر ټول منځني ختیځ خپرې شي.
