ځوانان دې دا ليکنه ځکه ولولي چې له حقايقو خبر شي

 زما د صدارت په مهال ، د ماليې وزارت  وزير ( کبیر ) خبر راکړ  چې د ډاکتر نجيب په فرمان يو ميليون طلايي سکې ماسکو ته لېږدول کېږي !! شپږ تنو وزيرانو ته مې دنده وسپارله چې د طلاوو د انتقال مخه ونيسي ، په دې سربېـره  نجيب د
 « تېپې تاريخي طلاوې » هم ماسکو ته لېږدولې ، ما يې مخه ونيوله او طلاوې مې بېرته را وګرځولې !! بله  پاموړ خبره دا وه چې زموږ هره وينا روسانو ليکله ، د چا پلار هم نه شو کولای د خپلې خوښې  وينا خپره کړي ، 
ډاکتر نجيب هم د « پيتروف » په نوم  يو سر مشاور لاره ، هغه ته به يې ويناوې ترتيبولې او د هغه د سپارښتنو مطابق به يې وړاندې کولې !! ماته يې هم ليکلې کړنلاره را ولېږله ، له دې سره يې يوه طرحه هم ضميمه کړې وه چې د شوروي ځواکونو له وتلو وروسته به کمونيستان په شمال کې يو ځانګړی حکومت جوړوي او  «  نجيب مسير » به يې مشري کوي !! ډاکتر نجيب له ياد طرحې سره موافقه وکړه  او د نجيب  مسیر  تر لار ښوونې لاندې يې يو پلاوي ته دنده وسپارله چې د شمال ( نه ۹ ) ولايتونه د يو حکومت په توګه اعلان او افغانستان تجزيه کړي !! روسانو ماته دنده وسپارله چې د خپلې کړنلارې سره يو ځای  ياد طرحه هم ملي شورا ته وړاندې کړم !! زه له دې طرحې سره قلباً موافق نه وم او  د دې  طرحې پرځای مې د مرکزي حکومت د ټينګښت خبره پکې قلمبند او شورا ته وړاندې کړه ... هغوی هم په ډېره ښه توګه دا خبره ومنله ؛خو « کاویاني » پې را ټوپ کړل ؛
- ته د داوود حکومت په  څېر اداره جوړوې ؛ له درې ژبو سره خيانت کوې !!
 مال ولي کاویاني صيب؟
 راته کړه يې : د شمال ولاياتو او دري ژبو حق څه شو ؟
وکيلان پوه شول چې خبره د تجزيې ده ؛ ځکه خو يې زما پر کړنلاره د تائيد ټاپه ولګوله او د افغانستان له تجزيې سره يې د مخالفت څرګندتيا وکړه ، افغانستان له« ملت خود مختار هزاره »  « ملت خود مختار بلوچ » ، « ملت خود مختار تاجيک » ، ازبيک ، ترکمن او بېلابېلو مستقلو حکمرانيو بچ شو !!
دا خبرې د ډاکتر نجيب له صدر اعظم « ډاکتر حسن شرق »  نه واورئ ، ضمناً دا هم مه هېروئ چې که د ډاکتر نجيب او روسانو طرحه عملي شوې وای اوس به افغانستان د څو خود مختاره حکمرانيو شاهد ؤ !! عجيبه خو دا هم ده چې کمونيستان ډاکتر نجيب د ډيورنډ لاين قرباني گڼي ، ناپوه ځوانان يې هم ور سره مني ؛ دوی په دې نه پوهېږي چې نجيب د اقتدار د پايښت لپاره نه يوازې  له ډيورنډ
لاين ؛ بلکې د شمال تر پولو پورې له ټولو ولاياتو تېر ؤ !!