د ثبات، قانون او ولسواکۍ پر لور د افغانستان اړتیا

ګرانو هېوادوالو!

افغان ولس له اوږدې مودې راهیسې دا هیله په زړونو کې لري چې داسې شرایط رامنځته شي، څو هر افغان وکولای شي خپل برخلیک د خپلې ارادې له مخې وټاکي. خو دا لوړه او انساني هیله هغه وخت عملي کېدای شي، کله چې په هېواد کې یو دایمي، باثباته او د قانون پر بنسټ ولاړ حاکمیت موجود وي.

په اوسني وضعیت کې واکمنه اداره تر ډېره سرپرسته بڼه لري او د ادارې مهم بنسټونه هم د سرپرستۍ تر سیوري لاندې فعالیت کوي. دا حالت نه یوازې د ادارې د پیاوړتیا مخه نیسي، بلکې د ولس باور هم کمزوری کوي. ځکه نو اړینه ده چې اوسني واکداران وهڅول شي، څو خپله سرپرسته دوره نوره اوږده نه کړي او د یو دایمي، منظم او قانونمند نظام د جوړېدو پر لور عملي او روښانه ګامونه پورته کړي.

که چېرې د دې بهیر د پرمخ بېولو بشپړ توان ونه لري، نو غوره ده چې له بېلابېلو لارو ورسره همکاري وشي، تر څو اداري جوړښتونه ثبات ومومي، چارې له سرپرستۍ ووځي او مسوولیتونه د دایمي او مسلکي کسانو له خوا پرمخ یووړل شي. دا به نه یوازې د دولتدارۍ بنسټونه قوي کړي، بلکې د راتلونکي سیاسي تحول لپاره به هم زمینه برابره کړي.

وروسته له دې پړاو څخه، ولس کولی شي په مدني، سوله‌ییز او معقول ډول د یوې منتخبې ادارې غوښتنه مطرح کړي او د ولسواکۍ پر لور خپل مشروع حرکتونه تنظیم او پیاوړي کړي.

په پای کې، دا باید ومنو چې ثبات، قانونمندي او د ولس اراده هغه درې بنسټیز عناصر دي چې د یو روښانه، عادلانه او باعزته افغانستان د جوړېدو لار هوارولی شي.