مهم ترین های امروز سه شنبه
🖌️: د افغانستان کرېکټ پخوانی ملي لوبغاړی او چټک توپ اچوونکی، شاپور ځدراڼ په هند کې د ورپېښې ناروغۍ له امله تېره شپه ساه ورکړې ده.
هېواد ته د هغه د جنازې د رالېږدولو د کره وخت په اړه تر اوسه جزییات نه دي ورکړ شوي.
🖌️: له پولیو پاک افغانستان پر اېکس لیکلي چې د پولیو (ګوزڼ) ضد واکسین کمپاین نن (سېشنبه) د کندهار ښار او د هلمند په لښکرګاه، نهر سراج، موسیکلا، واشېر او نادعلي/مارجې ولسوالیو کې ترسره کېږي.
له کورنیو غوښتل شوي چې خپل له پنځو کلونو کم عمره ماشومان واکسین کړي.
تر اوسه د عامې روغتیا وزارت په دې اړه څه نه دي ویلي.
🖌️: د کرنې، اوبو لګولو او مالدارۍ وزارت په یوه خبرپاڼه کې ویلي چې عطاءالله عمري، د یوه رسمي پلاوي په مشرۍ د کرنې او مالدارۍ په برخو کې له هند سره د دوهاړخیزو همکاریو د پراختیا په موخه دغه هېواد ته تللی دی.
د وزارت په وینا، په دې سفر کې به د کرنیزو اړیکو، د تجربو د تبادلې، عصري ټکنالوژۍ او د کرنیزو محصولاتو د صادراتو او وارداتو د پراختیا په اړه خبرې وشي.
🖌️: د رییس الوزرا اقتصادي معاونیت په یوه خبرپاڼه کې لیکلي چې د برېښنا انرژۍ پنځه کلن پراختیايي پلان د اسلامي امارت د رهبر له لوري منظور شوی دی.
په دغه پلان کې د اوبو، لمر، باد او ډبرو سکرو له سرچینو د برېښنا تولید، د لېږد مزو، سبسټېشنونو او توزیع لسګونه پروژې شاملې دي. د خبرپاڼې له مخې، د دې پلان پلي کېدل به پر وارداتي برېښنا اتکا کمه او د انرژۍ سکټور رول پیاوړی کړي.
🖌️: د کرنې او مالدارۍ خونې ویلي چې د افغانستان د کرنې او مالدارۍ د محصولاتو خونې، د هند د شمالي تخمونو ټولنې او د افغانستان نړۍوال نندارتون مرکز ترمنځ درېاړخیز تړون لاسلیک شوی دی.
دغه تړون به په راتلونکو کرنیزو نندارتونونو کې د هندي تولیدونکو ګډون اسانه او له منځنۍ آسیا سره سوداګریزې اړیکې پیاوړې کړي.
🖌️: پخواني ولسمشر حامد کرزي د افغانستان د کرېکټ د ملي لوبډلې د پخواني چټک توپاچوونکي شاپور ځدراڼ پر مړینه ژوره خواشیني څرګنده کړې ده.
حامد کرزي پر اېکس لیکلي، شاپور ځدراڼ د افغانستان د کرېکټ له لومړنیو ستورو و او د ملي لوبډلې د پیاوړتیا او نړۍوال ځلاند حضور لپاره یې نه هېرېدونکې هڅې کړې وې.
هغه د شاپور ځدراڼ کورنۍ، دوستانو او ټولو هېوادوالو ته د خواخوږۍ مراتب وړاندې کړي او نوموړي ته یې د جنت او کورنۍ ته یې د جمیل صبر دعا کړې ده.
🖌️: د کرېکټ د پخواني ملي لوبغاړي، شاپور ځدراڼ جنازه سبا مازیګر ۴ نیمې بجې کابل ته را رسیږي.
په پام کې ده چې د هغه جنازه د پنجشنبې پر ورځ د کابل په عیدګاه جومات کې ادا شي.
🖌️: د بهرنیو چارو وزیر مولوي امیرخان متقي د ملګرو ملتونو پراختیايي پروګرام له رییس الکساندر ډي کرو او د ملګرو ملتونو د کډوالو عالي کمېشنر برهم احمد صالح سره کتلي دي.
بهرنیو چارو وزارت د خبرپاڼې له مخې، په دې کتنه کې د افغانستان او ملګرو ملتونو د اړوندو ادارو تر منځ د همکاریو پر پیاوړتیا، د افغان کډوالو پر وضعیت، بشري او پراختیايي مرستو، د راستنېدونکو کډوالو د اړتیاوو، بدیل معیشت او د دوامدارو پراختیايي پروګرامونو په اړه خبرې شوې.
🖌️: د خصوصي روغتونونو مسوولان دې له حزبي فعالیتونو ډډه وکړي - د عدلیې وزیر.
د اسلامي امارت عدلیې وزیر عبدالحکیم شرعي د خصوصي روغتونونو له یو شمېر مسوولانو او ډاکټرانو سره په کتنه کې ټینګار کړی، چې د خصوصي روغتونونو مسوولان باید له هر ډول حزبي فعالیتونو او حزبي اړیکو څخه ډډه وکړي.
د عدلیې وزارت د خبرپاڼې له مخې، دا کتنه د دوشنبې پر ورځ( د چنګاښ پېنځلسمه ) د دغه وزارت په مقر کې ترسره شوې ده.
عبدالحکیم شرعي ویلي، چې ډاکټران د انسانیت او ټولنې د خدمت په برخه کې لوړ مقام لري او باید خپل مسوولیت پر رښتینولۍ ترسره کړي.
🖌️: د امریکا متحده ایالاتو ولسمشر ډونالډ ټرمپ ترکیې ته د سفر پرمهال څرګنده کړې چې له ناټو زیات ناهیلی شوی او که دغه ناسته ترکیه کې نه ترسره کېدای ممکن پکې ګډون به یې نه وای کړی.
ټرمپ اردوغان ستایلی او هغه یې ځواکمن مشر او پياوړی شخصیت بللی دی او وېنا یې ترکیه په پوځي لحاظ په ډېر ځواکمن هېواد بدل شوی دی.
🖌️: په خوست کې ۱۴۰ کلنه دښمني پر دوستۍ بدله شوه.
د خوست ولایت د سرحدونو، قومونو او قبایلو چارو وزارت سیمهییزې ادارې د قومي مشرانو، دیني عالمانو او مخورو د پرلهپسې هڅو له لارې د دغه ولایت د تڼۍ ولسوالۍ اړوند د سنګیو په کلي کې د دوه کورنیو ۱۴۰ کلنه دښمني پر روغه جوړه او ورورولۍ بدله کړه.
