غزې ته! - د دعا په شپه
استاد فضل ولي ناګار
نیمه شپه څه تېره مې غزې ته دعا وکړله
ما د ایماني روح جنازې ته دعا وکړله
چپ چپ و یسین د یحیی وینو نه لمبې ختې
ښه مې په رڼا کې شنې خازې ته دعا وکړله
غرقې، غرقې سترګې دستا جګې نورې ټیټې دي
مرګ د شهادت مستې غمزې ته دعا وکړله
سر مې ور دننه کړ یو شور د تکبیرونو و
ما د اقصی ماتې دروازې ته دعا وکړله
مرحبا د قطر ښاپیرۍ د کونړ حال اخلي
تږو یې د مخ سرخۍ غازې ته دعا وکړله
چپ تصویر سرود راځي د ذهن په پردو راته
زړه مې د ماضي مبارزې ته دعا وکړله
ټېټې سترګې ټول امت د ستا غږ تر اسمانه لاړ
چا د قدس د زړه دې ترازې ته دعا وکړله
جوش ملایک پور وړي سرې شپېلۍ د اسرافیل لره
تا ناګاره دغې انګازې ته دعا وکړله
