زموږ مسلماني
محمد طاهر محبی
★ اور که زما لمن سوځول، نو ملعون دی! خو که یې زما د رقیب، حریف، سیاسي مسلکي او مذهبي مخالف لمن سوځول بیا د رحمت رڼا ده!!!
★ مفتي صاحب که زما په ګټه فتوی راکول، نو شیخ الاسلام، فلان او مدان دی، خو که یې زما پر خلاف فتوی راکړل، بیا بلعم ابن باعورا دی.
★ مجلس کي که زما د حریف غیبت کېدی، دا د برکت مجلس دی!! که زما غیبت کېدی، بیا د الله د قهر مجلس دی، او شرکاء یې ګناه ګار دي.
★ همسایه که ما ته زما د ورور را څملولو لپاره اوږه راکول، دا الهي نصرت او همسایه مي د انصار الله رول لوبوي!! خو که همدې همسایه زما په خلاف زما د ورور د مرستي خبره وکړل، بیا دا همسایه د حزب الشیطان رسمي غړی دی، او هغه له څلوېښت کلونو مخکي لمونځ روژه یې لا د نفاق لپاره وه!!
★ که زه ګراک وم او دوکاندار د چنو وهلو څخه معذرت وغوښتی، نو سخت سنګدل او بخیل دی! خو که زه دوکاندار وم، او د ګراک د چنو وهلو څخه مي معذرت وغوښتی، نو واړه ماشومان راپسې دي، چه لس افغانۍ دې ته، لس هغه ته پرېږدم، نو وړو ماشومانو ته څه یوسم!!
★ که زه حاکم وم، او رعیت مي د ابوبکر او عمر رضي الله عنهما د خلافت بېلګي راته مخکي کړې، نو رعیت ته وایم چه تاسو زما لپاره د صحابه وو په شان رعیت سئ، زه به درته د خلفاء راشدینو په شان امیر او مشر سم!! خو که زه محکوم او رعیت وم، بیا خپل مشر او امیر ته وایم چه ته راته د خلفاء راشدینو په شان خلیفه سه، نو زه به هم درته د صحابه کرامو په شان رعیت سم!!
★ که زه رئیس صاحب وم، باید مامورین مي هره خبر بې چون او چرا ومني! خو که زه مامور وم، بیا باید رئیس صاحب ګذاره او تېر و بېر وکړي، کنه نو دوږخ یې ځای دی.
★ که زما ماشوم ورک وو، نو د مسجد په ګویا کي اعلان کول د انساني خواخوږي له مخي پروا نه لري، که د بل ماشوم ورک وو، بیا په مسجد کي د ورکي اعلان حرام دی.
★ او...
★ او...
نور تاسو ورسره ولیکئ.
هدانا الله جمیعا.
